Rannsókn á líðan þátttakenda

Rannsókn á líðan þátttakenda

Gerð var rannsókn á líðan þátttakenda (14-17 ára) sem fóru á námskeið í október 2006. Hér fyrir neðan eru helstu niðurstöður:

Sjálfstraust
Niðurstöður sýna fram á að þátttakendur bættu sjálfstraustið, höfðu meiri trú á sjálfum sér, hrósuðu sér meira og spáðu minna í hvað öðrum finnst um þá.
Þegar einstaklingar eru með gott sjálfstraust þá spá þeir minna í hvað öðrum finnst um þá og þora að vera þeir sjálfir. Þeir eru þar af leiðandi með sterkari sjálfsmynd sem er undirstaðan að því að vera með gott sjálfstraust (Erla Kristjánsdóttir o.fl. 2004).

Viðhorf
Niðurstöður sýna fram á að þátttakendur eru almennt jákvæðari, líta á framtíðina bjartari augum og eru jákvæðari gagnvart sjálfum sér. Þessar niðurstöður styðja það að hugarástand er eitthvað sem við sköpum að miklu leyti sjálf og getum stjórnað að öllu jöfnu (Jóhann Ingi Gunnarsson og Sæmundur Hafsteinsson, 2005).

Árangursrík tjáning
Niðurstöður sýna fram á að þátttakendur eiga auðveldara með að tjá sig fyrir framan bekkinn, í góðra vina hópi og við ókunnuga og þora meira að segja sína skoðun. Það ber vott um gott sjálfstraust að bera sig vel og koma skoðunum sínum á framfæri. Meginreglan er sú að einstaklingur sem er í góðu jafnvægi ber sig vel (Erla Kristjánsdóttir o.fl., 2004).

Leiðtogahæfileikar
Niðurstöður sýna að þátttakendur telja sig vera meiri leiðtoga en áður, þeir nota leiðtogahæfileika sína til að hafa áhrif á sjálfan sig og aðra og telja sig vera sterkari fyrirmynd. Goleman (2004) ræðir um að það sé nauðsynlegt að átta sig á því hverjir hæfileikar manns séu til að finna sitt raunverulega sjálf, hver er sú manneskja sem maður er í rauninni sem leiðtogi. Leiðtogar þurfa að þekkja kosti sína og galla, þekkja sín eigin takmörk til þess geta sett sín mörk.

Mannleg samskipti
Niðurstöður sýna fram á að þátttakendur bættu hæfni í tjáningu, bættu samskipti sín við foreldra, vini og kennara og eiga auðveldara með að kynnast öðrum. Það sem jákvætt er eftir námskeiðið er að þátttakendur eru meðvitaðri um það að eiga betri samskipti við kennara því þremur mánuðum eftir námskeið er skor þátttakenda hærra en í byrjun og lok námskeiðs.

Markmiðasetning
Niðurstöður sýna fram á að í lok námskeiðs setja þátttakendur sér markmið reglulegar, reyna frekar að ná þessum markmiðum og gleðjast yfir því þegar þeir ná þeim. Þeir telja einnig að með því að setja sér markmið nái maður meiri árangri í lífinu.

Rosenberg skalinn - Sjálfsmyndarpróf
Niðurstöður sýna í lok námskeiðs að þátttakendur hafa bætt sjálfsmynd sína og árangurinn er varanlegur. Þessar niðurstöður eru mjög jákvæðar og benda til þess að námskeiðið er ekki skammtímalausn til að bæta sjálfsmynd heldur hefur áhrif til lengri tíma. Gott sjálfstraust felur í sér að við tökum meðvitað þátt í að móta eigin sjálfsmynd, getum hugsað um þau áhrif sem aðrir hafa á okkur, valið og hafnað, og haldið okkar striki. Alla ævi getum við haldið áfram að bæta sjálfsmynd okkar (Jóhann Ingi Gunnarsson og Sæmundur Hafsteinsson 2005).

Að lokum
Í lok námskeiðs voru þátttakendur mjög sammála um að námskeiðið hjálpaði þeim við að ná árangri í lífinu og þremur mánuðum eftir námskeið voru þeir frekar sammála um að þeir væru að nýta sér námskeiðið í lífinu sjálfu. Því má álykta að námskeiðið hafi jákvæð áhrif á líðan þátttakenda, auki við sjálfstraust og trú á eigin getu bæði eftir námskeið og að þremur mánuðum liðnum.

Heimildir:
Erla Kristjánsdóttir, Jóhann Ingi Gunnarsson og Sæmundur Hafsteinsson. (2004). Lífsleikni. Sjálfstraust, sjálfsagi og samkennd. Reykjavík: Námsgagnastofnun.

Goleman, Daniel. (2004). Forysta og tilfinningagreind. Reykjavík: Sjónmál.

Jóhann Ingi Gunnarsson og Sæmundur Hafsteinsson. (2005). Með lífið að láni. Reykjavík: Hagkaup.